«Зекет және қайырымдылық» қорының Пригород елді мекенінде жүзеге асырып жатқан «Мамандықтар мектебі» әлеуметтік жобасы аясындағы қысқа мерзімді жазғы курс өз мәресіне жетті.

Курсқа қатысқан балалар үшін қорытынды күн ерекше әсерлі өтті. Жас қатысушылар Астана қаласындағы Қазақстан Республикасының Ұлттық музейі аралап, еліміздің тарихы мен мәдени мұрасымен жақынырақ танысты. Танымдық экскурсия балалардың білім көкжиегін кеңейтіп, туған елдің тарихы мен құндылықтарына деген қызығушылығын арттырды.

Экскурсиядан кейін оқу бағдарламасын сәтті аяқтаған балаларға арнайы сертификаттар табысталды. Бұл сертификаттар олардың жазғы демалысын тиімді өткізіп қана қоймай, жаңа білім мен пайдалы дағдыларды меңгергенінің айқын дәлелі болды.

Жоба аясындағы сабақтар мен түрлі танымдық іс-шаралар балалардың бос уақытын тиімді ұйымдастырып, олардың жаңа бағыттарға қызығушылығын арттыруға және қабілеттерін дамытуға бағытталды.

Балалардың қуанышы – біз үшін ең үлкен жетістік. Осындай игі бастаманың жүзеге асуына қолдау білдірген барша жанашыр азаматтарға алғысымызды білдіреміз.

Алдағы уақытта да балалардың білім алуына, қабілеттерін дамытуына және жаңа мүмкіндіктерге жол ашуға бағытталған әлеуметтік жобаларымыз жалғасын табады.