Жаңа оқу жылы қарсаңында республика көлемінде ұйымдастырылған дәстүрлі «Мектепке жол» қайырымдылық акциясы өз мәресіне жетті.

Әлеуметтік қолдауды қажет ететін балаларға көмек көрсетуге бағытталған акция барысында еліміздің барлық өңірінде қайырымдылық шаралары ұйымдастырылып, аз қамтылған және көпбалалы отбасылардан шыққан, жетім және ата-анасының қамқорлығынсыз қалған балаларға қолдау көрсетілді. Акцияның негізгі мақсаты – әр баланың жаңа оқу жылын толық дайындықпен, қуанышпен бастауына жағдай жасау. 

Акция қорытындысы бойынша республика көлемінде 22 278 балаға көмек көрсетілді. Балалар мектеп формасы, аяқ киім, сөмке, оқу құралдары мен кеңсе тауарлары және басқа да қажетті заттармен қамтылды.

«Мектепке жол» – қоғамдағы жанашырлық пен өзара қолдаудың жарқын үлгісіне айналған игі бастама. Акцияға мемлекеттік органдармен қатар, кәсіпкерлер, демеушілер, қоғамдық ұйымдар, еріктілер және қайырымды азаматтар белсенді атсалысты.

Бір баланың мектепке алаңсыз баруы – үлкен қуаныш. Ал 22 мыңнан астам баланың қуанышы – мыңдаған жанашыр жүректің ортақ еңбегінің нәтижесі.

Балаларға қолдау көрсетіп, игі іске үлес қосқан барша азаматтарға алғыс білдіреміз!

«Мектепке жол» – мейірімнен басталып, жақсылыққа жалғасатын жол!