Қазақстан мұсылмандары діни басқармасында Бас мүфтидің орынбасары, наиб мүфти Ермек Мұқатайдың төрағалығымен Құрбан айт мерекесіне дайындық барысына арналған арнайы жиын өтті.

 

Жиынға Қазақстан бойынша «Зекет» және «Уақып» қорының өкілдері қатысты.

 

Басқосуда ҚМДБ «Зекет және қайырымдылық» қорының директоры Мақсатбек Қайырғалиев «QURBAN2025» онлайн платформасының әзірлігі туралы баяндады. Сонымен қатар, қасапханаларда Құрбан шалудың нақты алгоритмі бекітілгенін хабарлады. Сондай-ақ, Құрбан айт кезінде зекет өкілдеріне арналған арнайы жилеткалар мен ет салатын пакеттердің таратылғаны айтылды.

 

Наиб мүфти Ермек Мұқатай Құрбан айт кезінде құрбандық етін жинау мен таратуда ерекше мұқият болуға шақырды. Еттің санитарлық талаптарға сай таза сақталуын, бұзылып кетпеуін қадағалау маңызды екенін атап өтті. Ол сондай-ақ ет алуға келген азаматтарға жылы қабақ танытып, көмек көрсету — әрбір мұсылманның міндеті екенін еске салды.

 

«Хадисте айтылғандай, тазалық пен күлімсіреу — мұсылманның сипаты. Құрбан айт мейрамы – бүкіл мұсылман қауымы үшін ұлық мереке. Сондықтан оны лайықты түрде, сән-салтанатты әрі жарасымды етіп өткізуіміз керек», – деді Ермек Мұқатай.

 

Наиб мүфти қасапханалардың толық дайын болуын тапсырды. Ет таратылатын орындар, пышақ пен өзге құрал-жабдықтардың санитарлық талаптарға сай болуы, сондай-ақ су, жарық, желдеткіш, тоңазытқыштардың толық жұмыс істеуі – басты назарда болуы қажет екенін баса айтты.