ҚМДБ «Зекет» қоры 2011 жылдың 3-ші маусымында Әділет Министрлігінде тіркелді. Қордың толық заңды атауы: «Қазақстан Мұсылмандары Діни Басқармасының Зекет Қоры» Корпоративтік қоры.

ҚМДБ «Зекет» қайырымдылық қоры – жеке және заңды тұлғалардың зекеттері мен садақаларын қабылдап, оны Шариғат үкімдеріне сай таратумен айналысатын ұйым.

Қордың құрылтайшысы – Қазақстан Мұсылмандары Діни Басқарамасы.

Республика бойынша «Зекет» қорының 20 өкілдігі бар. Әр өкілдік атқарған жұмыстары мен қаржылай есебін тапсырып отырады.

Миссиясы:

- Қасиетті Құран Кәрім мен Сүннетті басшылыққа ала отырып, шариғат үкімдеріне сәйкес Қазақстан мұсылмандарының зекетінің (85 грамм алтынның қаржылай зекетінің, төрт-түлік пен тауардың зекетінің, ұшырдың, сондай-ақ, пітір, нәзір садақаларының) ашықтық принциптеріне сәйкес жинап және таратуды жүзеге асырады.

Мақсаттары:

Шариғат бойынша мұқтаж жандарға зекет пен садақалар арқылы көмек көрсету. Ол төмендегі қордың жобалары арқылы іске асуда.

«Қолдан қолға» атты жоба аясында зекет таратылады.

«Тайқазан» жобасы бойынша жалғыз басты аналар мен көпбалалы мұқтаж отбасыларға азық-түлікпен көмек көрсетіледі.

Алланың дінін насихаттап, ата-баба салты мен діни білімді ұштастыра білген мешіт-медреселерге көмек көрсетіліп тұрады.

«Болашаққа үміт сыйла» атты ауқымды жоба аясында республика бойынша медресе шәкірттеріне қолдау көрсетілуде.

Сонымен қатар, «Жетім көрсең жебей жүр» атты қордың тұрақты жобасы аясында балаларға қуаныш сыйлап, көмек көрсетілуде.

«Құрбан шал да, қайырымды бол» жобасы аясында Құрбан айт кезіндегі рәсімдер өткізуге ат салысып, мұқтаж жандарға құрбан еттері таратылады.

«Мектепке жол» жобасы бойынша еліміздегі мұқтаж отбасылардан болған балаларға мектепке қажетті құрал-жабдықтар мен мектеп формалары таратылады.

Қыстың суық күндері баспаналарын жылытуға мүмкіндіктері жоқ отбасыларға «Жылулық сыйла» акциясы аясында көмірмен көмек көрсетіледі.

Республика бойынша ең ауқымды «Ел үлесі пәтерге» жобасы аясында аса мұқтаж отбасыларға баспана кілттері табысталуда.

Сонымен қатар, аталған жобалардан бөлек, қордың тұрақты «Берекелі нан», «Алтын алқалы анаға тосын сый», «Үміт сыйла сәбиге», «Табиғатты аялайық» сияқты жобалары жұмыс істеуде.

Өзін-өзі қаржылық тұрғыдан қамтамасыз ете алмайтын ауыл мешіттеріндегі дін қызметкерлеріне жалақы беру;

Қазақстанның діни оқу орындарындағы студенттерге шәкіртақы тағайындау;

Діни оқу орындарына ғимараттар салып, оларды техникалық базамен қамтамасыз ету;

Қазақстанның діни медреселеріне заманауи студенттер үйін салу;

Қажетті діни басылымдарды баспаға әзірлеп шығару, халыққа тарату;

Ислам дінінің лайықты түрде насихатталуына қаржылай қолдау көрсету;

ҚМДБ-ның басқа да діни қызметтеріне қаржылай қолдау көрсету.

Басты ұстанымы:

– Шариғатқа (Ханафи мәзһабы бойынша) сәйкестік

– Қаржылай ашықтық

– Ресмилік