ҚМДБ «Зекет және қайырымдылық» қорының директоры Мақсатбек Қайырғалиев Алматы қаласына жасаған іс- сапар барысында бірқатар іс шараға қатысты.
"Қайырымдылық жаршылары" форумы.
Алматы қаласында ҚМДБ «Зекет және қайырымдылық» қорының ұйымдастыруымен зекетке жауапты мамандар мен еріктілерге арналған "Қайырымдылық жаршылары" форумы өтті. Іс-шарада Қор директоры Мақсатбек Қайырғалиев мұқтаж жандардың өтініштерін қабылдау кезінде жылы шырай танытып, көмек көрсетуді шынайы мейіріммен атқару қажеттігін атап өтті. Сондай-ақ, Зекет қорының бүгінгі күнге дейін атқарған игі істері туралы баяндап, еріктілерге алғысын білдірді.
Мамандарға арналған семинар
Форум аясында Алматы қаласы мен Алматы облысындағы қайырымдылыққа жауапты өкілдер үшін оқыту семинары ұйымдастырылды. Бағдарлама барысында қатысушыларға қайырымдылық жұмыстарын тиімді ұйымдастыру, сондай-ақ SMM және мобилография бағыттары бойынша қысқа мерзімді курстар өткізілді.
Бұл семинардың мақсаты – өңірлік өкілдердің кәсіби біліктілігін арттырып, көмек көрсету жұмыстарын заманауи, жүйелі және тиімді жолмен жүзеге асыру.
Зекеттің мәні саудагерлерге түсіндірілді
Форуммен қатар, Алматыдағы «Алтын Орда» базарында саудагерлерге зекет пен садақаның діндегі орны, жетім-жесірге, мұқтаж жандарға, мешіт пен медресеге көмек берудің артықшылығы түсіндірілді. Шарада ҚМДБ «Зекет және қайырымдылық» қорының директоры және өңір имамдары зекеттің қоғамдағы әд
ілет пен қамқорлықты күшейтетінін атап өтті. Саудагерлер тарапынан қойылған сұрақтарға толық жауап берілді.