Бүгін Қазақстан мұсылмандары діни басқармасының Төрағасы, Бас мүфти Наурызбай қажы Тағанұлы «Зекет және қайырымдылық» қоры жүзеге асырып жатқан жоба аясында Алматы облыстық орталық мешітіне қарасты «7 нүкте» Брайль орталығында көру қабілеті төмен жандармен кездесті.

Кездесу барысында Бас мүфти орталықтың қызметімен танысып, зағип жандарға арналған діни білім беру ісінің маңыздылығына тоқталды. Сондай-ақ «7 нүкте» орталығында жүзеге асырылып жатқан оқу бағдарламалары, Браиль әдісімен Құран Кәрім мен Құран әліппесін оқыту барысы таныстырылды.

Іс-шара аясында Браиль нұсқасымен жарық көрген Құран Кәрім мен Құран әліппесінің танытымы өтіп, осы бағытта қызмет атқарып жүрген ұстаздарға біліктілігін арттыру курсын аяқтағандығы туралы сертификаттар табысталды. Аталған курсқа Қазақстанның бес өңірінен келген әйел ұстаздар қатысты. Сонымен қатар орталықтың дамуына үлес қосып жүрген азаматтарға алғыс білдірілді.

Шара аясында орталыққа Брайль қарпімен және 2D форматта басып шығаратын арнайы принтер табысталып, бұл құрал көру қабілеті төмен жандардың діни білім алу мүмкіндіктерін кеңейтуге бағытталғаны атап өтілді.

Айта кетейік, Бас мүфти бастамасымен және «Зекет және қайырымдылық» қорының қолдауымен ашылған «7 нүкте» орталығы бүгінде көру қабілеті төмен жандар үшін рухани-білім беру бағытындағы маңызды жоба ретінде жүзеге асырылып келеді.