Қазақстан Республикасының Каир қаласындағы Елшілігі Әл-Азһар университетінде білім алып жүрген қазақстандық студенттерге арнап ауызашар дастарқанын жайды.

Қасиетті Рамазан айында ұйымдастырылған рухани басқосу Каирдегі Сұлтан Бейбарыс мешітінде өтті. Іс-шара Қазақстан мұсылмандары діни басқармасының Мысырдағы өкілдігіне қарасты «Талаба» қауымдастығының студенттеріне арналды.

Кеш барысында Қазақстанның Мысыр Араб Республикасындағы Төтенше және Өкілетті Елшісі Асқар Жеңіс ауызашарға жиналған жамағатты қасиетті ораза айымен құттықтап, мұндай тағылымды кездесулердің мән-маңызына тоқталды. 

Өз кезегінде ҚМДБ-ның Мысырдағы тұрақты өкілі Руслан Амантұрсынұлы жиналған жастарға Қазақстан мұсылмандары діни басқармасының Төрағасы, Бас мүфти Наурызбай қажы Тағанұлының ыстық сәлемі мен Рамазан айына арналған құттықтауын жеткізді. Ол білім мен руханиятты қатар алып жүрген қазақ жастарының ел абыройын асқақтатып жүргенін ерекше атап өтті.