Алматы Орталық мешітінде ҚМДБ «Tawaf travel» компаниясы арқылы бес дін қызметкері мен шаруашылық қызметкеріне үлкен қажылық сапарына жолдама табысталды.

ҚМДБ Төрағасы, Бас мүфти Наурызбай қажы Тағанұлының тапсырмасына сәйкес Алматы қаласының бас имамы Төлеби Дәділұлы жұма намазынан кейін ұзақ жылдар бойы адал еңбек еткен қызметкерлерге қажылыққа жолдама сыйлады. Іс-шараға ҚМДБ "Зекет және қайырымдылық" қорының директоры Мақсатбек Қайырғалиев және «Tawaf travel» компаниясының директоры Бектемір Ысқақов қатысты.

Қажылыққа жолдама алғандар: Қалқаман-2 мешітінің наиб имамы Бейсенбаев Хайролла, Түркістан облысы, Абай ауданы, Абай ауылының имамы Садықов Айдарбек, Алматы Орталық мешітінің шаруашылық қызметкері Мұқамбеков Жөкеш, БҚО Казталов аудандық мешітінің имамы Жандосбек Құсайынов және Наурызбай ауданы «Қарағайлы» мешітінің наиб имамы Қалыбай Мәлік.

Мешіт қызметкерлері ұйымдастырушыларға алғыстарын білдіріп, алдағы уақытта да дініміздің асыл құндылықтарын насихаттау жолында еңбек етуге ниеттестігін жеткізді.

Айта кетейік, қажылық сапар ҚМДБ «Tawaf travel» компаниясы арқылы ұйымдастырылады.