Ерекше жандар күніне орай «Зекет» қоры QJ еріктілерімен бірлесіп, ерекше білім беру қажеттіліктері бар балаларға арналған «Шексіз өрнек» атты сурет салу шеберлік сағатын ұйымдастырды.

Игі шараның басты мақсаты – балалардың шығармашылық қабілеттерін дамыту, өнерге деген қызығушылықтарын арттыру және оларға рухани қолдау көрсетіп, қуаныш сыйлау.

Шеберлік сағатына «Шабыт» ұлттық өнер университетінің студенттері арнайы қатысып, балаларға сурет салудың түрлі әдіс-тәсілдерін үйретті. Жас өнерпаздар балалармен бірге шығармашылық жұмыстар орындап, олардың қиялына қанат бітірді.

Шара барысында балалар түрлі түсті бояуларды пайдаланып, өз ойлары мен армандарын қағаз бетіне түсірді. Әрбір туынды олардың ішкі жан дүниесін, ерекше көзқарасын және шексіз қиялын бейнеледі. Шығармашылыққа толы кездесу балаларға көтеріңкі көңіл күй сыйлап, өз қабілеттерін еркін көрсетуге мүмкіндік берді.

Сонымен қатар, шара аясында қатысушы балаларға қаржылай сыйлықтар табысталды. Бұл игі бастама балалардың қуанышын еселеп, кездесудің әсерлі сәттерінің біріне айналды.

Аталған шара ерекше балаларға қолдау көрсетудің, олардың бойындағы талантты ашудың және қоғамда мейірімділік пен жанашырлық құндылықтарын дәріптеудің маңыздылығын көрсетті.

«Зекет» қоры игі бастаманың жүзеге асуына үлес қосқан «Шабыт» ұлттық өнер университетінің студенттері мен QJ еріктілеріне шынайы алғысын білдіреді.

Әр бала – қайталанбас әлем, әр талант – баға жетпес қазына. Өнерде шекара жоқ, ал мейірімнің шегі жоқ!