Қарағанды қаласындағы «Кербез» балаларды оңалту орталығының бір бөлмесі «Зекет» қорының қолдауымен заманауи оңалту және дамыту құралдарымен толық жабдықталды. Бұл – республика бойынша қордың қолдауымен жабдықталған тоғызыншы оңалту орталығы.

Игі бастаманың негізгі мақсаты – ерекше қолдауды қажет ететін балалардың жан-жақты дамуына қолайлы жағдай жасау, олардың сенсорлық қабылдауын, қимыл-қозғалыс дағдыларын және танымдық қабілеттерін жетілдіруге мүмкіндік беру.

Жоба аясында орталықтағы арнайы бөлмеге сенсорлық-динамикалық кешен, ұсақ моториканы дамытуға арналған құралдар, бизиборд және балалардың дамуына арналған түрлі ойыншықтар орналастырылды.

Аталған жабдықтар балалардың қозғалыс үйлесімділігін жақсартуға, ұсақ моторикасын дамытуға, зейінін шоғырландыруға және танымдық қабілеттерін арттыруға бағытталған. Сонымен қатар жаңа құралдар оңалту және дамыту сабақтарын тиімді әрі қызықты ұйымдастыруға мүмкіндік береді.

Жаңадан жабдықталған бөлмені салтанатты түрде табыстау рәсіміне «Зекет» қорының мамандары мен Қарағанды облысының бас имамы Естай Айтуғанұлы арнайы қатысты.

Жиын барысында балалардың дамуына қолайлы орта қалыптастырудың маңыздылығы мен осындай қайырымдылық бастамалардың қоғам үшін мәні атап өтілді.