Қарағанды облысы, Шет ауданына қарасты Ақсу-Аюлы ауылында үш баланы жалғыз тәрбиелеп отырған анаға баспана кілті табысталды. Бұл – Қазақстан мұсылмандары діни басқармасының «Зекет және қайырымдылық» қоры жүзеге асырып келе жатқан «Ел үлесі – пәтерге» жобасы аясында берілген 919-шы баспана.

Игі шараның басты мақсаты – әлеуметтік қолдауға мұқтаж отбасыларға көмек көрсету, олардың тұрмыс жағдайын жақсарту және қоғамда қайырымдылық пен жанашырлық құндылықтарын кеңінен насихаттау.

Аталған жоба аясында бұл жолы үш баланы жалғыз тәрбиелеп отырған ана баспаналы болып, отбасы үшін қуанышты күн туды. Жаңа қоныс ана мен балаларына жайлы өмір сүруге мүмкіндік беріп, болашаққа деген сенімдерін нығайта түспек.

Баспана – әр отбасының тұрақтылығы мен берекесінің негізі. Сондықтан мұқтаж жандарды тұрғын үймен қамтамасыз етуге бағытталған мұндай қайырымдылық шараларының әлеуметтік маңызы зор.

Айта кетейік, «Ел үлесі – пәтерге» жобасы аясында еліміздің әр өңірінде баспанаға мұқтаж отбасыларға жүйелі түрде көмек көрсетіліп келеді. Бүгінгі күнге дейін жоба шеңберінде 919 отбасы баспаналы болды.

Қайырымдылық шарасының жүзеге асуына үлес қосқан барша азаматтарға алғыс білдіріліп, жаңа қоныс иелеріне ізгі тілектер айтылды.

«Зекет және қайырымдылық» қорының «Ел үлесі – пәтерге» жобасы алдағы уақытта да мұқтаж отбасыларға қолдау көрсетіп, қайырымдылық пен өзара жанашырлық дәстүрін дәріптеуге бағытталады.