Солтүстік Қазақстан облысының ірі шаруа қожалықтарына «Зекет және қайырымдылық қорының» директоры Мақсатбек Мақсотұлы бастаған жұмыс тобы мен жергілікті имамдар арнайы атбасын бұрды.

Кездесудің басты мақсаты — егін өнімі мен төрт түлік малдан берілетін зекет пен ұшырдың орындалу тәртібін кеңінен түсіндіру, сондай-ақ ел арасында қайырымдылық пен өзара бауырмалдық мәдениетін арттыру.

Сапар барысында сарапшылар мен діни өкілдер аграрийлерді толғандырған сұрақтарға тұщымды жауап беріп, зекеттің мұқтаж жандарға қолдау көрсетудегі әлеуметтік маңызын атап өтті. Қор өкілдері мұндай танымдық кездесулерді еліміздің басқа да өңірлерінде белсенді жалғастыратынын жеткізді.