25 -28 қыркүйек күндері Астана қаласында «Неврологиялық ауруларды диагностикалаудағы, емдеудегі және оңалтудағы мультидисциплинарлық тәсіл» тақырыбында өткен халықаралық конференция өтуде.

Конференция аясында «ОҢАЛТУ» Ұлттық Реабилитациялық Орталықтар Қауымдастығының Президенті Ажар Ғиният «ҚМДБ Зекет және қайырымдылық» қорының директоры Мақсатбек Қайырғалиевке «Алтын шипагер» үздік белгісін салтанатты түрде табыс етті.

Айта кетейік, бұған дейін ҚМДБ «Зекет және қайырымдылық» қорының директоры Мақсатбек Қайырғалиев сыйлық ретінде Тараз қаласында орналасқан «Dara Bala», оңалту орталығына, «Асыл мирас» аутизмі (аутистік спектрдің бұзылуы) бар балаларды қолдау орталығына балалардың моторикасын дамытатын және логопедикалық үстелдерді, бизибордтарды табыстаған болатын.

Сондай-ақ, «Өмірге үміт сыйла» жобасы аясында «ҚМДБ Зекет және қайырымдылық» қоры елордадағы «Ұлттық балаларды оңалту орталығына» демалыс бөлмесіне қажетті кілем, теледидар, диван, 8 дана бизиборд (баланың моторикасын дамытатын құрал), 52 дана төсек үстелі (тумбочка), 4 мүгедектер арбасы, 3 ауыр науқастарға арналған кресло дәретханасын тарту етті. Ерекше атап өтетін жайт, 52 дана төсек үстелі «Zeket Hub» қайырымдылық орталығының жиһаз жасау цехында әзірленген.

Еске салайық, «Өмірге үміт сыйла» жобасы аясында бүгінге дейін Қазақстан мұсылмандары діни басқармасы тарапынан еліміз бойынша 128 оңалту орталығына 500-ден астам бизиборд пен логопедикалық үстелдерді тегін таратылды.