ҚМДБ Республикалық ақпараттық-насихат тобының мүшесі, «Зекет және қайырымдылық» қорының директоры Мақсатбек Қайырғалиев өткен аптада қордың жалпы жұмыс барысын түсіндіру мақсатында Жетісу облысы Панфилов ауданына арнайы екі күндік іссапармен барды.
Жоспарға сәйкес, Мақсатбек Мақсотұлы Жаркент қаласындағы Панфилов аудандық орталық мешітінде имам-молдалармен кездесіп, біліктілікті арттыру семинарын өткізді.
Қасиетті жұманың таңында исламның бес парызының бірі – зекетті насихаттау мақсатында Атамекен, Үлкеншыған, Кішішыған ауылдарының тұрғындарымен қырман басында жүздесіп, ұшыр жайында кеңінен тоқталып, сауапты істен құр қалмау, кедей-кепшіктерге жәрдемдесу жайында уағыз-насихат айтып, алып жатқан өнімдеріне береке тіледі.
Сондай-ақ, қор директоры Мақсатбек Мақсотұлы мен облыс бас имамы Керімбек Сәрсембайұлы «Жылу сыйла акциясы» аясында 3 тонна көмірден әлеуметтік жағдайы төмен 10 отбасыға сертификаттар табыстады. Осыдан соң орталық мешіттің жиналыс бөлмесінде ауданға танымал кәсіпкерлермен кездесіп, сұрақтарына жауап берді. Белсенді, дін жанашырларына алғыс хаттарын табыстап, сыйлықтарын ұсынды.
Елімізде қазан айының екінші жексенбісі «Мүгедектегі бар адамдар күні» болып белгіленуіне орай Мақсатбек Қайырғалиев бен облыстың бас имамы Керімбек Сәрсембайұлы «Зекет және қайырымдылық» қорының Панфилов аудандық мамандарының ұйымдастыруымен №4 мектеп-интарнатына жақында ғана салып бітірген жаңа моншаның ашылуына қатысып, өз сыйлықтарын табыс етті. Тәрбиеленіп жатқан 30-ға жуық баланың жай-күйі, аталмыш мекеменің тыныс-тіршілігімен жақыннан танысып, осындағы балаларға қамқорлық танытып, тәрбиелеп отырған мекеме басшысы мен тәрбиеші ұстаздарға алғысын білдірді.
Кешкі құптан намазы уақытында Мақсатбек Қайырғалиев Жаркент қалалық «Елтай» мешітінің жамағатымен кездесіп, «Берілген нығметті бағалау, қадіріне жету» тақырыбында уағыз айтып, жамағат тарапынан қойылған сұрақтарға жауап берді.
Қор директоры сапарының соңы «Қайырымдылық жаршылары» атты өңірлік еріктілер форумымен түйінделді. Мақсатбек Мақсотұлы сауапты іске атсалысып, ерекше ықылас танытқан азаматтарға өз атынан алығыс хаттар табыстап, шынайы ризашылығын білдірді.