Сұрақ:  Күміс мөлшері екі жүз дирхемнен асып кетсе зекетін қалай шығарады?

Жауап: Әбу Ханифаның айтуынша екі жүздің үстіндегісі қырық дирхемге жетпейінше ештеңе берілмейді. Қырыққа жетсе тағы бір дирхем береді. Әрі қарай да осылай есептеледі, яғни әрбір қырық дирхемнен бір дирхем. Ал, Әбу Юсуф пен Мұхаммедтің пікірінше үстіндегі қосымшасы қырық дирхемге жетсе де, жетпесе де зекетін есептеп шығару керек.

Сұрақ: Алтыннан берілетін зекеттің мөлшері қанша?

Жауап: Жиырма мысқал (85г.) алтынға ие болғанына бір жыл өтсе жарты мысқалын зекетке береді. Жарты мысқал жиырма мысқалдың оннан бірінің ширегіне (2,5%-ке) тең. Сонан соң әрбір төрт мысқалынан екі қират (өлшем бірлігі). Ал, үстіндегі төрт мысқалға жетпесе Әбу Ханифаның пікірі бойынша берілмейді, ал, Әбу Юсуф пен Мұхаммедтің пікірі бойынша есептелініп берілуі тиіс.

Сұрақ: Алтыннан жасалынған әйелдер тағатын әшекейлі бұйымдардан, ыдыс-аяқтардан зекет беріле ме?

Жауап: Алтын мен күмістің қандай түрі болсын, қолданса да, қолданбаса да зекет мөлшеріне жетсе зекеті шығарылуы тиіс.

Сұрақ: Алтын не күмістен жасалынған бұйымдарда қоспалар болса не істеу керек?

Жауап: Егер қоспаның басым көпшілігі күміс болса оның барлығын күміс деп есептейді. Ал, егер, керісінше, көбі басқа зат болса күміс деп есептелмейді. Қоспалы алтынның үкімі де осындай.

Сұрақ: Бір кісінің қолында не алтын, не күміс болмаса, бірақ, үкіметтік банкте өзіне тиесілі құнды қағаздары болса солардың зекетін бере ме?

Жауап: Иә, егер зекет мөлшеріне жетсе береді. Өйткені мұндай құнды қағаздар ақша сияқты сату-сатып алынуда пайдаланылады. Сондай-ақ, банкке өткізсе бағасы шығарылып, сатып алынады.